الفنانة التائبة Vs نجم الجيل.. قصة أزمة كليب "مش أنا" بين تامر حسني وحلا شيحة.. والأخيرة تعلق: "اتصدمت وأنا تبت"

وقعت مشادات خلال الساعات الأخيرة بين المطرب تامر حسني والفنانة حلا شيحه التي تشاركه في أحدث أفلامه وهو "مش أنا"، وذلك بسبب عدد من المشاهد التي طرحت بكليب مجمع من الفيلم.

أزمة الكليب بين المطرب والفنانة
البداية عندما عبرت الفنانة حلا شيحة عن غضبها من طرح أغنية جديدة بمشاهد من فيلمها الأخير مش أنا، مع الفنان تامر حسني.

وكتبت حلا رسالة مطولة على صفحتها الرسمية بموقع الصور والفيديوهات إنستجرام قالت خلالها: "اتفاجئت جدا بنزول كليب يجمع فيه مشاهد متفرقة من الفيلم وخصوصا بعد آخر بوست نزلته ووضحت فيه أنا إيه ، واتفاجئت أكتر خصوصا بعد وعد تامر حسني ليا وتأكيده إنه هیحترم رغبتي وبعض الطلبات اللي طلبتها منه بكل احترام وود الصيف اللي فات وأکدلي إنه هيحترم رغبتي".


وتابعت حلا: "إحنا يمكن نجحنا بمقاييس الدنيا بس صدقوني بمقایيس ربنا إحنا لم ولن ننجح أنا عارفة ومتأكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح بتكلم من قلبي الكليب ده ميرضيش ربنا وأنا عيطت لإني شفت نفسي في المشاهد دي".

وأضافت: "دي كانت زلة نتيجة ظروف مريت بيها وكلنا بنغلط ولازم نغلط علشان إحنا بشر بس المصيبة إننا بنغفل وبننسی".


واستكملت: "أنا مش هتكسف من حد أنا تبت من المشاهد دي وهي لا تصح وأنا غلطت وبصلح وأهم حاجة إن ربنا يرضى عني لأن في الآخر ده اللي هينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص إحنا أغلبنا ناسينها إلا القليلين منا الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن".

وتابعت: "إحنا كلنا عندنا امتحان في الدنيا دي وحابة أفكرك بالفيديو ده یا تامر اللي قولت فيه أنا مش بتمنى أموت وأنا مطرب أنا دايما خايف کده، كلام أكيد قولته في لحظة صدق جواك وجوانا كلنا من شوفه تاني يمكن يفكرك أن جواك اكيد في صراع وأنا وكلنا كلنا بنغلط بس المهم في الآخر نتدارك الغلط ونصلح .{إلا من تاب وآمن وعمل عملا صلحا أوللېك يبدل الله سيئاتهم حسن وكان الله غفورا رحيما.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد".

رد تامر حسني على الاتهامات
ومن جانبه، رد نجم الجيل على تلك الرسالة، ونفى الفنان تامر حسنى، كل الاتهامات التى وجهتها له الفنانة حلا شيحة، بسبب مشاركتها فى أحدث أفلامه "مش أنا"، قائلا إن كل ما حدث كان بالاتفاق بينهما ولم يجبرها أحد على فعل ذلك، وتقاضت أجرا كبيرا على عملها بالفيلم، بل بالعكس هى من كانت تتهرب من الرد على تليفوناته من أجل التحضيرات الأخيرة للفيلم.


ونشر حسنى، بيانا إعلاميا، للتوضيح عبر حسابه الرسمى على "فيسبوك" قال فيه: "نهاركم جميل يا أغلى الناس.. الحقيقة عمرى ما بتخيل إنى أدخل فى نقاش بالشكل دا مع زميل بحترمه وكان فى بينا كل خير.. للتوضيح بما إنك يا حلا كتبتى بوست وأشركتى الجمهور الكريم معانا بدال ما كنتى تكلمينى شخصياً ونتناقش بينى وبينك، فأنا مضطر أرد هنا برضو.. أولاً أنا عمرى ما وعدتك إن الكليب مش هينزل دا محصلش أصلاً يا حلا مش أنا خالص اللى أوعد وأخلف". 

وتابع: "الحقيقة إنى احترمت كلامى معاكى ووعدتك أشيل مشاهد تانية طلبتيها وشيلتها بالفعل وشكرتينى عليها ولو حابه تفتكرى المشاهد اللى اتشالت بعد أذنك روحى شوفيها فى المونتاچ عند الأستاذ عمرو عاكف أو كلميه يبعتهالك كلها موجودة، وبعدين الفيلم بقالة 3 أسابيع فى السينمات والكليب موجود جوة الفيلم هو بالنسبالك الحرام إننا ننزل الكليب على اليوتيوب بس! إنما الكليب يتشاف جوه السينمات عادي؟ منطق غريب فعلاً يا حلا".

واستطرد: "بعدين هو مش أنتى اللى مضيتى عقد وتقاضيتى عليه مبلغ كبير عشان الدور دا بعينه! هو مش إنتى اللى صورتيه ومثلتيه بنفسك وبمنتهى الرضا ولا حد أجبرك ؟! وللتوضيح للجمهور الكريم أنا والمخرجة الأستاذة سارة وفيق بعتنالك وكنا بنتحايل عليكى تيجى تشوفى شغلك قبل إصدار الفيلم عشان لو عندك أى ملحوظه تقوليها، ماكنتيش بتردى علينا وتليفوناتك كلها كانت بتقفل فى وشنا،، إنتى للأسف يا حلا متعاملتيش صح مع الموقف كان لازم تهتمى بأمرك أكتر من كدا ولو كان ليكى أى طلب تانى كنت هعمله بكل حب إنما إنتى فجأة اختفيتى ومكملتيش تركيب صوتك فى الفيلم ولا جيتى تتصورى عشان آفيش الفيلم أصلًا ومخليتيناش نعرف نعمل آفيش مجمع! و بقيتى تقفلى تليفوناتك وتكنسلى علينا كلنا". 

وأضاف: "وبعدين أى فيلم بيبقى ليه خطة مسبقه فى الدعاية وأنتى عارفاها كويس ووافقتى عليها ودا كليب رومانسى يعنى معقول كنتى عايزة المنتج يشيل كل مشاهدك اللى صورتيها من الكليب ويطلعنى بغنى وبقول الكلام الرومانسى دا للأستاذ ماجد الكدوانى مثلاً هو دا يُعقل؟!

واختتم رده قائلًا: "أنا زعلان منك جداً يا حلا على مفردات البوست بتاعك الغير موفقه ومستحيل هرد بطريقتك اللى فيها تجريح واتهامات باطلة ليا إحتراماً لحجات كتير يمكن فايتاكى بس مش هتفوتنى وعلى فكرة أنا واثق أنك عارفه أنى مستاهلش منك كدا وهكتفى بالتوضيح دا وربنا يهدى الجميع ويكتبلك كل الخير اللهم آمين".