حوار الدموع.. ياسمين عبدالعزيز: ربنا رد فيا الروح.. وكرهت كلمة "وحش الكون"

حلت الفنانة ياسمين عبدالعزيز ضيفة على الإعلامية منى الشاذلي على قناة CBC لتتحدث عن أزمتها الصحية الأخيرة التي مرت بها خلال الأشهر الماضية.

وللمرة الأولى ظهرت ياسمين عبد العزيز في لقاء تلفزيوني مساء الأربعاء، لتتحدث فيه عن تفاصيل ما جرى، وكونها تعاني من مرض يسمى "أكياس الشوكولاتة"، منتشر لدى بعض النساء، ومصابة به منذ أن كانت في الـ 16 من عمرها.

وفيما يلي يقدم "نيوز 24" أبرز التصريحات التي أدلت بها ياسمين عبدالعزيز خلال الحلقة:

- مكنتش عارفة إن فى يوم هطلع فى برنامج أتكلم فى حاجة زى كدة، كنت داخلة أعمل عملية بسيطة جدا ومش أول مرة أعملها، عملتها 5 مرات، وكنت أعملها وأمشى على طول وأروح شغلى ومحدش يعرف حاجة.

- كان الدكتور بيقولى إزاى تستحملى الوجع ده إنتى بطلة، وأنا بطبعى مش شكاية، روحت أعمل العملية، قلت للدكتور العملية هتاخد قد إيه، قال ساعتين أو تلاتة، كان معايا أحمد وابنتى وصاحبتى، دخلت عملت العملية وكان فيه عملية أخرى فى نفس الوقت، يعنى فى شهرين عملت 4 عمليات، دكتور التجميل بيجمل بطنى، طلعت من العملية بألم رهيب جدا وبصرخ وأقول أنا بموت.


- فيه تفاصيل أنا مش فاكراها، من كتر ما كانوا بيدونى مسكنات ومخدر، البعض اعتقد إنى بدلع، بعد كام يوم الدكاترة قالوا لو مدخلتش أعمل عملية بعد ساعة هموت، حدث ثقب فى القولون وتسمم فى الدم، دخلت العمليات وكنت حاسة إنى مش هطلع.

- وأنا داخلة قلت لأخويا الكبير خلى بالك من ياسمين وسيف أولادى.. كنت حاسة إنى هموت، ولما دخلت كانت حالتى صعبة، طلعونى من العملية على العناية المركزة.

- وأنا فى المستشفى الممرضات كل شوية يقولولى يلا يا وحش الكون.. جات لى عقدة من هذه الجملة ومن المسلسل ومكنتش عايزة أشوفه.

- حد قال لأخويا هي دخلت على الجهاز ده، اللى بيدخل عليه مابيطلعش.. من بداية أول عملية حتى العناية المركزة كنت فى شبه غيبوبة، وكل ما أنام فى العناية المركزة ييجي نفس الكابوس، وقررت إنى مش هنام ومش هغمض عينى، وأنا عمرى ما جالى كوابيس، وفيه وقت ما فى العناية قلت لهم: "أنا مش قادرة أكمل شيلوا الأجهزة والأدوية.. أنا هبقى مرتاحة لو رحت لربنا.

- وأنا بحس إنى خلاص هموت، نسيت كل اللى حواليا وفكرت إنى رايحة لربنا لوحدى، وسألت نفسى: أنا عملت إيه فى اللى فات، هو أنا كنت كويسة؟ وشريط كل اللى فات جه فى دماغى.

- قبل ما أدخل العملية بأسبوع جت لى رسالة من التربى وعمره ما بعت لى رسالة قبل كدة.. أنا بتعامل مع الترب على إنها بيتى الثانى.. والتربى بعتلى فيديو بيجهزولى التربة.


- فى يوم عرفة بعد العملية الأخيرة العوضى نشر "بوست" وطلب من الناس الدعاء، بس كنت أول مرة أحس الإحساس ده إنى خلاص هموت، وخسيت 15 كيلو، كله بيدخل يعيط ويقول لى خلاص هتسبينا، لغاية يوم عرفة الناس كلها دعيت لى وربنا استجاب، وبعد يوم عرفة بقيت إنسانة تانية.. طلعت من العناية ودخلت غرفة عادية، وردت فيا الروح.. أنا واحدة كنت بموت وربنا رد فيا الروح.