"بقالي 17 سنة مشربتش مياه خالص".. إفتكاسات سماح أنور.. طريقة غريبة للحفاظ على جسمها.. ورد صادم حول فرضية الحجاب
تصدر اسم الفنانة سماح أنور مؤشرات البحث على موقع "جوجل" خلال الساعات الأخيرة بعد تصريحاتها المثيرة للجدل حول شرب المياه.
بقالي 17 سنة مشربتش مياه خالص
وصرحت الفنان سماح أنور، أنها امتنعت عن شرب المياه منذ 17 عامًا، وذلك أثناء استضافتها في برنامج "كلام الناس" على شاشة فناة إم بي سي مصر".
وقالت سماح أنور: "لازم المياه ميبقاش لها طعم ولا ريحة، دي مواصفات المياه اللي تتشرب وتنفع، المياه كلها ليها طعم وريحة، دي مبشربهاش، لما باخد شوية منها جسمي بيدايق علطول، بلاقي بطني وجعتني، وأنا لما ألاقي جسمي أضايق، بعرف أنا أخدت إيه دلوقتي، عشان في حاجات مينفعش معايا وخلاص، أنا لازم أعرفها، عشان أنا اللي بضايق، وأنا اللي بتعب".
وأضافت: "مش لازم نشرب المياه في بوقنا، ممكن ناكل المياه، أنا باكل المياه كتير، من فواكه وخضروات، لإن هي دي المياه اللي محتاجها الجسم، لو وقفتنا في الهوا، الجسم بيشرب الرطوبة اللي في الهوا، ده حقيقي، كل مسامنا بتشرب طول الوقت، البيزنس الأمريكاني بيقولك اشرب مياه طول الوقت، وكل اللي شرب مياه طول الوقت تعبوا، لإن ده مش طبيعي، الطبيعي أن جسمي عايز حاجة هديهاله، لكن ما أجبرش جسمي على حاجة هيرقدني على طول، أوعلى المدى الطويل".
واستكملت: "المياه المعدنية لها طعم ولون وشوائب، أنا لما بشرب مياه بتعب، أشرب مياه مغلية أو فيها عصير أو قهوة، أنا كده بشرب مياه، فيه دكاترة هيختلفوا معايا وأنا موافقة عليهم أكتر من كلامي، لإن أنا بتكلم عن النظام بتاعي أنا بس، أنا مش متخصصة، مش بقول متشربوش مياه، أبقى مجنونة، أنا بقالي 17 سنة مشربتش مياه خالص".
مليش علاقة بأن الحجاب فرض ولا مش فرض
وفي وقت سابق، كشفت سماح أنور عن رأيها في الحجاب أثناء حلولها ضيفة على برنامج "لحظات جريئة" مع الإعلامي أحمد سالم، المذاع عبر قناة "القاهرة والناس" الفضائية، رداً على سؤال "هل الحجاب فرض أم اختيار؟"، لترد قائلة: "أغطي شعري ليه؟!.. الأئمة والشيوخ اللي هما بني آدمين زيي أجمعوا إنه فرض، لكن ربنا قال إيه والقرآن قال إيه".
فأجابها المذيع بالآية القرآنية: "وَلْيَضْرِبْنَ بِخُمُرِهِنَّ عَلَى جُيُوبِهِنَّ"، فأجابته: الشيوخ فسروا الآية بطريقتهم وأنا فسرتها من وجهة نظري.. إن ربنا خلقلي شعري أغطيه ليه، هل المشكلة في إني اغطي شعري ولا إني اغطي عورتي.. ما أنا بشوف في الشارع بنات محجبات ولابسين استرتش هل ده يرضي ربنا؟!.. أنا بني آدم عادي لو حطيت حاجة على دماغي بتخنق".
وأردفت حديثها قائلة: "مليش علاقة بأن الحجاب فرض ولا مش فرض.. أنا اتولدت لوحدي وهموت لوحدي وهتحاسب لوحدي وربنا اللي هيحاسبني.. وسيبوني مع العظيم اللي خلقني.. وهو ربنا خلق الضحك ليه؟ محدش يخوفني من ربنا"، لافتة إلى أن كثرة المتحدثين فى الإسلام أحد أسباب تراجعنا، ويجب ترك الإسلام للمتخصصين فقط، وعدم التركيز مع الذين يعتبرون أنفسهم أوصياء على الدين".
