عاجل
الجمعة 29 مارس 2024
رئيس مجلس الادارة
رجب رزق
رئيس التحرير
سامي خليفة
الرئيسية القائمة البحث

الرئيس السيسي: مصر كادت أن تضيع فى 2011

الرئيس السيسي
الرئيس السيسي

قال الرئيس عبد الفتاح السيسي، أن التحدي الأول للدولة المصرية بعد عام 2011 كان حالة التشرذم والتفكك وفقد الأمل واليأس لكل المصريين.. ودي مش وليدة 2011.. ده منهج اتعمل على مصر بفكر معين علشان أن الدولة لما تقع هتبقي في أيديهم.. الدولة لما بتقع مش ترجع تاني".

وأضاف الرئيس السيسي، خلال كلمته في القمة العالمية للحكومات المقامة في دبي بالإمارات: "بقول للمنطقة العربية.. الدولة اللى تقع صعب رجوعها.. ومصر رجعت ليه؟!.. ده إرادة ربنا.. دي كانت حالة تشرذم ويأس عند المصريين.. الحالة دي حالها إيه.. وتحديات أخري".

وتحدث الرئيس عبد الفتاح السيسي عن التجربة المصرية، قائلا: "هتكلم عن التجربة المصرية كحكومة ومسار.. البداية في 2011 ومش بكلم المتخصصين والمفكرين.. أنا بكلم شعوب.. التجربة المصرية بقولها للناس.. والمتخصص عارفين كلام كتير من اللى بقوله.. واللى بيدير دولة عارف إيه متطلبات الدولة.. مصر موجودة علشان تحكي حكاية، ومسار مصر في 11 سنة".

وأضاف الرئيس السيسي، خلال كلمته في القمة العالمية للحكومات المقامة في الإمارات: "عام 2011 كان حاسما وكاشفا.. كادت مصر أن تضيع.. ومحدش نجي إلا مصر.. لو اتكلمت التحديات المتوازية.. يعني إيه متوازية.. ما فيش تحدي قبل تحدي.. التحديات كلها على خط واحد.. مفيش أولويات لده انى اخد ده واسيب ده.. ما ينفعش تتساب.. لازم أجابه كل التحديات".

كما قال الرئيس عبد الفتاح السيسي، إن الوضع بعد عام 2011 كان صعبا للغاية، مضيفا: "حالة الفوضى اللى حصلت في 2011 كلفت مصر 450 مليار دولار فى دولة ظروفها الاقتصادية مش قوية.

وأضاف الرئيس السيسي، خلال كلمته في القمة العالمية للحكومات: "أنت كمسئول حريص على حل المسائل والحفاظ على الدولة".

وقال الرئيس عبد الفتاح السيسي، إن مساحة مصر مليون كيلو متر2، ويعيش السكان على 5% من أرضها طوال العمر، وهناك تحدي لنقل السكان إلى مساحات أخرى، مضيفا: "خلاص ضاقت علينا، وحتى بيئيا أصبحت مؤذية، وإحنا بنتكلم دلوقتي في 24 مدينة ذكية".

أضاف الرئيس السيسي، في كلمته بالقمة العالمية للحكومات بدبي: "النتائج التي حدثت بالتواجد بتاعنا بالشكل التقليدي اللي بنتكلم عليه ده، بقى فيه أكتر من 40% أو 50% من الكتلة السكانية في مصر عشوائيات، خلاص بقى ما فيش تنمية عمرانية خالص لأن الناس عايزه تعيش وبس، فكان لابد أن نخرج بره الشريحة دي ونصل إلى 10% أو 12% من مساحة مصر".

وتابع الرئيس عبد الفتاح السيسي: " إحنا بنتكلم على إنك عايش منذ أكثر من 200 سنة على 4% أو 5%، وعايز خلال 10 سنين تبقى بتعيش على 10% أو 12%.. أيوه، والعاصمة جزء من ذلك".

وعن تمويل العاصمة الإدارة الجديدة، كشف الرئيس السيسي، قائلا: "الفلوس جايه منين؟ موازنة الحكومة لا تتحمل بناء هذه المدن، لكن الفكرة ديما اللي أنا بقولها للدول اللي عايزه تحل مسائل وظروفها الاقتصادية لا تسمح، أنا النهارده لو حسبت متر الأرض في العاصمة بـ100 جنيه هيبقى المساحة كلها 70 مليارا، ولو حسبته بـ1000 هيبقى 700 مليار، ولو حسبت المتر بـ10 آلاف هيبقى 7 تريليون، الفكرة إزاى تحول المتر من 100 جنيه لمتر بـ10 آلاف جنيه، وأنت عندك نمو سكاني، وفيه طلب وكل سنة بيتجوز 700 و800 ألف شاب وشابه، يعني بتتكلم في عدد من الوحدات السكنية بعيدة عن الريف، 400 ألف أو 500 ألف شقة سنويا، طيب أعملهم في القاهرة الزحمة؟ ولا في الإسكندرية الزحمة، ولا في أي محافظة ولا أطلع بره، ولما طلعت بره إحنا من خلال الأرض التي أعيد تسعيرها بالفكرة بأنها بقت العاصمة فبقى المطور العقاري عايز يدخل، وأنا اشتغلت مطور استراتيجي في الـ24 مدينة بفلوس الأرض دي".

وأردف الرئيس السيسي: "هناك تحدي لجودة التعليم وتحدي لجودة الصحة، مع فرص العمل جميعا تحدث التنمية البشرية، والإنسان الذي نتحدث عنه ينتج بعد القيام ببرنامج كبير جدا، أنا لما أجي أعمل مسار تعليمي جديد أو مسار تعليمي متطور أشوف نتايجه بعد 14 سنة بعد إطلاقه، مع أو خريج بخطة طويلة الأمد".

وأكمل: "كان عندي مشكلة في الجهاز الإداري، مترهل ومتراجع وشهد توظيف مليون ونصف أثناء الثورة، وكان بتلت الموظفين يشتغل الجهاز الإداري، وأنا في العاصمة الجديدة عملت ميكنة والحكومة الذكية على أعلى مستوى، ثم كل المطالب المطلوبة لحكومة جديدة كفكرة وليس كأشخاص موجود في العاصمة".