«بعد نجاتها من حادث سير».. داليا البحيري تكشف تفاصيل صيف مليء بالأزمات

نشرت الفنانة داليا البحيري عبر حسابها الرسمي على "إنستجرام" صورة من حادث السير الذي تعرضت له مؤخرًا، كاشفة عن سلسلة من الأحداث الصعبة التي مرت بها خلال الصيف.

 وعلقت قائلة: "الحمد لله على كل شيء طبعًا، لازم دايمًا نحمد ربنا في كل وقت وعلى أي حال. اللي يعرفوني كويس عارفين إني بعشق الصيف – بحب البحر والشمس واللمة والعيلة وحتى فاكهة الصيف. لكن الصيف ده كان من أسوأ الصيفيات اللي عدت عليّ في الساحل".

وأوضحت أنها كانت تمر بفترة ضغوط شديدة، حيث اضطرت للانتقال من منزل لآخر بشكل مفاجئ، دون أي تخطيط مسبق، مما سبب لها توترًا كبيرًا. وأضافت: "انهارت مناعتي وبقيت عيانة جدًا لمدة 3 أسابيع! كان عندي دور برد شديد أو كورونا – زي ما تحبوا تسموه.

ولما بدأت أتحسن، جوزي حسن تعب وعداني، وكانت حالته أصعب بكتير، واضطرينا نروح المستشفى، وقعدنا هناك 4 ساعات في تكييف شديد البرودة وكأننا في ديب فريزر!" وتابعت: "رجعنا من المستشفى، وبعد أقل من ساعة، حرارتي ارتفعت تاني ورقدت في السرير، ومن ساعتها مش بتحسن. وكمّلت معاناة الصيف وأنا سايقة راجعة من الساحل للقاهرة وأنا تعبانة، وانفجر كاوتش العربية وطلع منه دخان! بس الحمد لله إنه حصل عند البوابة وماكنتش ماشية بسرعة… ربنا سترها".

واختتمت داليا البحيري منشورها قائلة: "رغم كل اللي حصل، هافضل أحب الصيف وأستناه كل سنة. وبطلب منكم دعواتكم لأني فعلًا استويت. وعلى فكرة، أنا مش من الناس اللي بتحب تكتب بوستات درامية، بس كان لازم أشكر رجال المرور اللي ساعدوني وغيرولي الكاوتش، حتى لو كانوا مستعجلين عشان تشريفة الوزير، بس كانوا في قمة الشهامة".

إقرأ أيضا .. مهرجان الغردقة لسينما الشباب يكرم نيكول سابا في حفل افتتاح دورته الثالثة