نادية الجندي عن نصر أكتوبر: «جسمي بيقشعر كل ما أفتكر لحظات الانتصار»

استعادت الفنانة نادية الجندي ذكرياتها مع انتصار السادس من أكتوبر، مؤكدة أن تلك اللحظات لا تزال حاضرة في وجدانها، وأن مشاركتها في فيلم «مهمة في تل أبيب» جاءت بدافع وطني ورغبة في تقديم عمل يوثق تلك المرحلة التاريخية للأجيال الجديدة.

وقالت نادية الجندي، خلال مداخلة هاتفية مع الإعلامية نهال طايل في برنامج «تفاصيل» المذاع على قناة «صدى البلد 2»: «دايما كده يا رب في انتصارات، ومن انتصار لانتصار، ربنا يحفظ مصر ويحفظ كل الدول العربية يا رب ونعيش في انتصارات على طول».

وأضافت نادية الجندي: «لما بتذكر الفيلم برجع بالذكريات، دي أيام جميلة عاشت في ذاكرتي ووجداني ووجدان كل الشعب المصري والعربي، وده انتصار من عند ربنا في رمضان في أيام مفترجة، وانتصار أسطوري ما كانش طبيعي، انتصار يعيش في وجدان كل الأجيال، فأنا عشت اللحظة دي، عشتها بكل كياني».

نادية الجندي: عشت لحظة الانتصار بكل كياني
وأضافت: «علشان كده قررت إني أنا أعمل فيلم مهم، "مهمة في تل أبيب"، وتناول القضية الفلسطينية، وكفاح جيشنا العظيم اللي اخترق الساتر الترابي بعظمة وبعبقرية، الساتر الذي لا يقهر، خط بارليف، أنا بتكلم دلوقتي وجسمي بيقشعر، لأن أنا اللحظات دي ما زالت في وجداني».

الفن يوثق اللحظات التاريخية للأجيال
وأوضحت نادية الجندي: «الفن هو مرآة الشعب، مرآة للواقع، والسينما والفن لازم يخدم ويؤرخ اللحظات التاريخية. لازم اللحظات دي نؤرخها عشان أجيالنا، وعشان أجيالنا الجديدة تشوف قد إيه جيشنا العظيم انتصر، وقد إيه الدولة صمدت السنين دي كلها، فلازم الحاجات دي تؤرخ».

نادية الجندي: الفن بالنسبة لي رسالة
وتابعت نادية الجندي: «الفن بالنسبة لي رسالة، أنا لما عملت الفيلم ده، عملته بإحساسي ومن قلبي، وحقق نجاح كبير جدًا؛ لأنه كان واقعي جدًا، وأنا فخورة إن كل حرب وكل تاريخ 6 أكتوبر بيعرضوا لي هذا العمل، يعني أنا حاسة بفخر إني أنا قدرت أقدم شيء، ولو بسيط لبلدي من خلال الحاجة الوحيدة اللي أنا أملكها، اللي هو فني».