باسم يوسف يشكر الدفاع لبطلان حكم الـ50 مليون جنيه
حرص الإعلامي باسم يوسف على تقديم الشكر لأعضاء هيئة الدفاع الخاص به في قضية ضد قناة cbc، وذلك بعد بطلان الحكم الذى صدر ضده بضرورة دفع 50 مليون جنيه تعويض.
وكتب باسم على صفحته الشخصية: زي ما كتير منكم تابعوا والصحافة نشرت السنة اللي فاتت صدر حكم تحكيم تجاري ضدي وضد كيوسوفت للبرمجيات يلزمني أنا شخصيًا بتعويض50 مليون جنيه و50 مليون تانية لو الشركة عجزت عن تسديد ما عليها من تعويض، وكتير منكم برضه مشكورين باركوا لي علي حكم بطلان حكم التحكيم اللي صدر الاسبوع اللي فات، ولكن اللي كتير من الناس ميعرفهوش أن خلال السنة دي تم بذل مجهود غير عادي من فريق دفاع مصري محترف أغلبه من الشباب اللي فضل شغال بالرغم من توقعات ناس كتير من أساتذة قانون وغيرهم أن الموضوع منتهي.
وأضاف: "وعشان كدة كان لازم قبل مالقضية دي تتقفل وتتنسي أني أشكر كل واحد اشتغل علي القضية دي من أكبر أستاذ لأصغر محامي وبالأخص د. فتحي والي ود. محمد صلاح عبد الوهاب واستاذ حازم رزقانة ود. اسماعيل سليم واستاذ عبد الله الشهابي، وأخيرًا وليس آخرًا أكيد أستاذ هشام فودة مدير فريق الدفاع، شكرًا لكل واحد فيكم وأنا واثق إن القضية دي هتفضل يتضرب بيها المثل كواحدة من أغرب قضايا التحكيم في التاريخ المصري".
وتابع: "ازاي قناة منعت برنامج و عملت بيانات علنية ضد المذيع و الشركة المنتجة و منعت عرض الحلقة المتسلمة و شوهت سمعتنا و بعدين حكم تحكيم يديهم 100 مليون جنيه و يبقى المذيع هو المسئول عن سدادهم، وعشان افكركم، دي فقرة من حيثيات الحكم، اللي المفروض يبقى في قضية تحكيم تجاري. يعني فلوس وبنود عقد؛ مش الكلام الحنجوري اللي مكتوب ده. واللي على فكرة بيوحي أن بتوع برة تنفع معاهم البرامج دي بس بتوع جوة كخة وفاقدين أهلية.
حيثيات رأي سياسي بامتياز مش حكم تحكيم".
