إترفد بسبب البنات.. رحلة محمد رياض مع مهنة "مدرس الكيمياء"

تصدر اسم الفنان محمد رياض مؤشرات البحث على موقع جوجل خلال الساعات الحالية بعد روايته عن تدريسه للكيمياء خلال تواجده في برنامج معكم منى الشاذلي.

رحلة محمد رياض مع مهنة "مدرس الكيمياء"

تحدث الفنان محمد رياض عن بداياته قبل عمله في مجال الفن، قال محمد رياض خلال حواره في برنامج "معكم منى الشاذلي"، على قناة cbc، إنه تخرج في كلية العلوم، وكان يحب الكيمياء للغاية، والتحق بقسم الأبحاث والتطوير في إحدى الشركات، ووصل لدرجة أنه اخترع بعض المركبات وأطلق عليها اسمه.

أضاف محمد رياض أنه عمل في مجال الكيمياء قبل دخول الفن، قائلا: "أنا اخترعت حاجات والله العظيم عملت حاجات باسمي قبل ما أسيب الشركة اللي كنت بشتغل فيها، سبتها لأن خلاص مكنش هينفع أكمل عشان التمثيل، وكنت شغال في الأبحاث والتطوير بتاع الشركة".

أوضح أنه عند تخرجه امتهن العديد من المهن إلى جانب دراسته في معهد التمثيل، قائلا: "أنا كنت لسه متخرج من كلية علوم وشغال كيميائي الصبح وبشتغل في معمل تحاليل وبشتغل في مدرسة بنات 3 أيام في الأسبوع لكنهم رفدوني".

تابع: "كنت لسه صغير عندي 22 سنة وشعري أصفر وحليوة وبروح لابس تيشيرت وبنطلون جينز.. وأول ما دخلت المدرسة لقيت الطابور بقى فيه همس.. بنات بقى كلهم 18 سنة وعمالين بيتكلموا مين ده وبتاع".
أضاف: "شوية ودخلت الفصل لقيت كله بنات وقاعدين جنب بعض بين الديسكات وزحمه، طلع إن البنات جم من فصول تانية يحضروا حصة الكيميا.. يعني المفروض الفصل 25 بـنت لقيت عندي 60 بنت.. وتقريبا الكيميا أحلوت في عينهم ساعتها".

أشار محمد رياض إلى أنه في اليوم التالي طلب منه المدير ألا يحضر طابور الصباح ثانية، ففعل ذلك، واستمر في العمل لفترة، إلى أن استدعاه المدير مرة ثانية لمكتبه، قائلا: "المدير قالي أنت شخص كويس جدا ومدرس هايل ولا غبار عليك، بس أنت مش هينفع تكمل معانا.. أنا عندي بنات صغيرين ومينفعش احط الزيت جنب النار.. واترفدت من غير ما أعمل حاجة".

وتحدث الفنان محمد رياض، عن مشواره الرياضي واعتزاله كرة القدم واتجاهه للتمثيل، مؤكدا أنه كان لاعبا ضمن صفوف نادي أبو سمبل": "كنا نادي درجة تانية، تحت سن 17 سنة و19 سنة.. وقتها طلعنا الدوري الدرجة الأولى وبنلاعب الأهلي والزمالك والفرق دي، وكنا فرقة بلا تمويل، مكنش فيه فلوس وكنا بنشتري الحاجات على حسابنا".

وتابع رياض: "كنت بلعب باك رايت وكنا بنلاعب نادي اسمه نادي المية،وفي الشوط الأول الكورة اترمت من ورايا وشايفها عدت من فوقي وبيني وبين لاعب الفريق التاني 5 أو 6 متر قلت هلف براحتي ده مش هيجيبني، في ثانية مشوفتوش، الواد صاروخ خد الكورة وجاب جون، أول جون جه بسببي".

وأضاف محمد رياض: "عرفوا بقى إني مش عارف ألاحق الواد، فيرموا الكورة من ورايا والواد صاروخ، مش عارف أضربه ولا أوقفه ولا عارف أعمل حاجة، ده كان أسرع من محمد صلاح، والله ما كنت بشوفه، بيعدي بسرعة الصاروخ، مبلمحوش، كان خرافة.. خلصت الشوط الأول وطبعا غيرني المدرب، مكملتش الماتش دخلت أوضة اللبس وغيرت ورجعت البيت واعتزلت ومروحتش النادي تاني خالص".

يذكر أن محمد رياض يشارك في رمضان 2023 في مسلسل "المداح ... أسطورة العشق".

محمد رياض حاصل على شهادة البكالوريوس المعهد العالي للفنون المسرحية، وكان قد درس بكلية العلوم (قسم كيمياء) قبل التحاقه بمعهد المسرح. عمل في المسرح والتلفزيون والسينما، كان نجاحه الكبير في التلفزيون. هو متزوج من الممثلة رانيا محمود ياسين ابنة الممثل محمود ياسين والممثلة شهيرة.