هل يمكن تأجير الاب بالساعة وتصبح وظيفه له بـ "بابا جه"

الخميس 14/مارس/2024 - 04:18 م

بمراجعة مسلسل بابا جه والذى يعرض خلال موسم الدراما الرمضانية الحالية والمستند على الفيلم الكورى Dad for rent إنتاج عام 2014 فكرته قائمة على قيام ابنه البطل بعرض والدها للتأجير فى حفله المدرسة وأنها شايفه أنه أب ملوش وجود أو استخدام فى حياتها وأنه لا يضفى لها قيمه محددة غير أنه أب فقط مهمل غير مسئول ولا يعمل حتى علاقتهم متوترة جدًا فى حين أنها شايفه والدتها هى قائد وعمود البيت ..

الحقيقة قصة مهمة جدًا جيد طرحها حتى لو كان فى إطار كوميدى فالمسلسل المصري هنا فى أول حلقتين لعب على أكتر من خط درامى الخط الأول عدم عمل الاب وأن الام هى رب المنزل بل حتى مديره على بنتها فى المدرسة وعندها فرض سيطرة كامل على العائلة بقوه واحكام وده من المفترض يكون مسئولية الاب مش الأم اللى كتير من الابهات فاكرين أن الام هى اللى عليها كل حاجة وهو وجوده أنه مضخة فلوس بس لكنه حاجات كتير جدًا هو الامان قبل كل شىء والسند لكن أصبح دوره هامشى ..

الخط الثانى هنا ان البنت والأم شايفين ان الأب لا أضافة له فى حياتهم فى حين أنها بمجرد ما طرحت الموضوع على الملا فى الحفلة فى طفل جرى عليه واحتضانه بشده أنه محتاجه جدًا وان فى اسرة تانية محتاجين الاب ده وكان فى مشهد دافئة بين الطفل والاب فى أنه مثلا حكى له حدوته ملهاش اى فائدة لكن كان الطفل سعيد جدًا به وبوجوه فى حياته لدرجة دفعت أم الوالد انه يجى للولد بمقابل مادى كنوع من ادخال السعادة لقلبه المشاهد كانت مبكية جدًا ودرامية رغم اعتمادها داخل قالب كوميدى لكن هيشعر بيها اللى محروم من باباه اوى الفترة دى ..

عجبنى جدًا ان المسلسل مش محتاج اضفاء ايفيهات والتمثيل فيه مريح جدًا وفيه طرح درامى مهم مرتبط بنفسية الطفل ودور الاسرة فى تشكيل النفسية دى وان العاتق ليس على الام فقط ولابد من أن كل أب يكون شريك فى المسئولية دى سؤاء كان مضغوط فى العمل أو لا يكون فى توازى فى العلاقه .

معجبة جدًا ان مؤلف العمل شخصية واعية بالدراما والكوميديا الهادفة أ. محمد إسماعيل أمين مؤلف راجل وست ستات وتامر وشوقيه وجوز ماما ولسه بدرى وبكار وعالم سمسم والباب فى الباب أضافة لفيلم خطة مازنجر بالتعاون مع أ. وائل حمدى وان العمل من اخراج الاستاذ الجميل خالد مرعى اللى كان عنده عناية جدًا فى اختيار القصة وتوظيفها الدرامى واختيار الممثلين زى الفنان أكرم حسنى ونسرين أمين وفريال يوسف واوتاكا بجد اللى دمه خفيف جدًا والفنان ياسر الطوبجى.

وكانت مفاجئتين العمل الطفلة لافينا نادر والتي وجهها معبر جدًا كطفله ومتقمصة الدور باحترافية عالية ومتعايشه الحاله جدًا مثل ايضا مسلسل صوت وصورة وفيلم شلبى وايضا الطفل " تفاحة المسلسل" "سليم مصطفى" طفل جميل جدًا ومشاهده ابكتنى جدًا وهو محتاج لأب ده لامسنى جدًا فى احساسه ، أكتر حاجة عجبتنى جدًا تتر البداية المعبرة عن شخصية أكرم فى كل مرة بيقدم فيها مسلسل بيكون فى تتر مختلف وبهجة مختلفة معبرة عن حالته اثناء الاحداث السنه اللى فاتت كنت بحب تتر مسلسل الصفارة دلوقتى بحب تتر بابا جه والموسيقى التصويرية لخالد الكمار.