ياسمين رئيس تكشف عن أمنياتها وتجربة فيلم "ماما وبابا"
حلت الفنانة ياسمين رئيس ضيفة على برنامج "أسرار النجوم" الذي تقدمه المذيعة إنجي علي عبر إحدى المحطات الإذاعية، حيث تحدثت عن رحلتها في مجال الفن والأمنيات التي تتمنى تحقيقها للفنانين.
وقالت الفنانة ياسمين رئيس : "أنا نفسي أكتب حكايتي مع الفن.. ونظرتي للشغلانة اختلفت عن أول ما بدأت، في البداية مكنتش فاهمة كنت داخلة أمارس هوايتي، ومش عارفة أنا داخلة أعمل إيه ولا أنا فين".
وأضافت: "بدأت بحاجة بحبها، مش شغل، لكن الموضوع مش كده، لازم يكون فيه فكر وترتيب، وحاجات تنفع وحاجات متنفعش، وناس أكبر مني وناس أصغر مني، حاجات كتير اتعلمتها مع الوقت".
كما تطرقت إلى الضغوط التي يتعرض لها الفنانون قائلة: "نفسي يقدروا الإنسان أكتر من الوقت. الفنانون بدأوا يضغطوا على نفسهم جدًا، وبيبقوا شباب وتعبانين، وللأسف، معندناش تأمين في شغلانة الفن، فبتمنى يكون فيه تأمين على الفنانين".
وتابعت ياسمين التحدث عن فيلمها الأخير "ماما وبايا" قائلة: "أنا اتمنيت أعمل فيلم زي فيلم ماما وبابا، والحمد لله جالي الموضوع واتبسطت جدًا، وعمري ما جربت إحساس إن الأطفال بتضحك وهي بتتفرج على فيلم ليا، وكان معايا ابني في العرض الخاص ودي أول مرة يحضر معايا، هو وأصحابه وولاد أخويا قعدت معاهم ولما كانوا بيضحكوا كان من قلبهم، قلبي كان بيرفرف بجد".
وكشفت عن سبب حماسها لتقديم الفيلم وعلاقته بمسلسل "اللعبة"، قائلة: "كان نفسي أعمل حاجة أعرف ولادي وولاد أخويا يتفرجوا معايا ويبقوا بيضحكوا ومبسوطين، دي أكتر حاجة كنت بفكر فيها يمكن عشان أنا أم، وغيرت بصراحة ابني مش بيتفرج على حاجات كتير بس بيتفرج على مسلسل "اللعبة" وبيحبه جدًا جدًا فغيرت كدا قولت أنا عايزة أعمل حاجة يتفرجوا عليها ويضحكوا الولاد والحمد لله أنا كل حاجة اتمنيتها حصلت وحشة أو حلوة، أنا اتمنيت أعمل النوع دا فيلم عائلي العيلة كلها تعرف تتفرج عليه، والحمد لله جالي الموضوع واتبسط جدا".
